好心做壞事

我身邊有 d 朋友 (相識少過十年個 d)，都會為我心急 (或奇怪)，我應該有個女伴，硬要說他某某好o岩我，硬要將某某同我拉埋一齊，亦好奇怪我會甘抗拒或者去迴避，我都好明白佢地o既心態，佢地無錯，因為佢 地多數都係結左婚或者正在熱戀中，人係呢個時候，都係好開心，開心到希望身邊每一個人都好似佢甘開心，所以特別希望朋友中有個係獨身o既話，總會不自覺或 有意幫朋友搵個伴‧呢 d 唔係叫多事，完全係好朋友o既表現‧我都曾經好似佢地甘，係拍拖o既時候，亦係甘介紹女仔比我 d 朋友‧所以我都明白佢地、亦都好多謝佢地‧
但每一個人都係一個故仔，如果未知個故仔始末，就一廂情願去自以為可幫手，甘就真係好心做壞事o路‧我並唔係個 d 終日留戀昔日o既人，但記憶就係記憶，有 d 真係忘記唔到，當呢 d 記憶再浮現，個心真係痛一痛、o那一o那，個種感覺真係好辛苦，亦控制唔到‧我宜家就好辛苦‧
可能我平時亂說話同羅便宜 (語言上)，比人一個感覺我係好積極去溝女，其實我只係唔想去諗痛苦o既記憶‧如果無得撩女仔，我就會攪到自己好忙，接多 d 野番黎做‧所以我越撩女仔或越忙，可能就係我最唔開心o既時候！好似好可悲，但係呢個係事實，係我自己，係我o既故仔...

o訓唔著

好耐無更新個 blog，一來真係好忙，呢一個月接左兩隻貓 b -- 矇矇查查‧將我同肥波o既生活倒轉再倒轉‧起初想波仔可以有朋友仔可以同佢玩，但波仔好似唔係好接受兩隻 b，每天我返黎o既時候，他只係o係門口喵我幾聲，要我幫佢按摩幾下，跟住就跳上櫃頂收埋自己，完全唔同兩隻 b玩，已經一個月了，佢仍然係甘‧我真係好擔心佢，每日都盡量同佢玩同埋傾計，等佢知道我仍然最鍚佢‧其實波仔好可憐，當佢得一個月o既時候，我在屋企樓 下見到佢，佢好瘦同埋全身濕o西，不停係度震‧本來我已入左地下大閘，佢仍然用軟弱o既聲音喵左我兩聲，我回頭望住佢，佢見我望住佢，佢似乎想行過我度， 但因為無力，只係手仔不停撥，我真係唔忍心，如果o個晚我不救佢，佢第二朝一定死，當時我住係土瓜灣，係租套房住，我同包租公講，只要救生佢，過兩日會放 佢返出街，最後當然無啦，因為佢好懂事同好乖，一星期之內，我知道我係唔可以忍心再棄置佢返出街，連包租公都唔忍心趕佢走，就算包租公唔俾養，我都會搵第 二度租啦！呢四年佢同我都相處得好好，有好開心，有好唔開心o既時候，佢都係我左右，佢比我之前o既貓咪更懂事同乖‧但宜家佢好似好唔開心，我都好唔開 心，一心本來想佢無o甘悶，搵隻小朋友陪佢，令佢開心 d，反而令佢好唔開心甘，都只怪我一廂情願為佢好，原來事實係重衰左‧唉... 成世人都係甘‧
人 - 我就成日估計錯誤o者，連我 d 貓咪都估錯，我真係失敗‧真係好希望識得聽佢講野，等佢教我做人‧